Beint á efnisyfirlit síðunnar

Á döfinni

19

Haukur Gunnarsson

Haukur Gunnarsson frjálsíþróttamaður var útnefndur í Heiðurshöll ÍSÍ á Íþróttamanni ársins þann 29. desember árið 2020.

Haukur Gunnarsson fæddist 20. október árið 1966. Hann hneigðist snemma til íþrótta og stundaði fótbolta af kappi sem barn. Þegar hann var þriggja ára gamall greindist hann með spastíska lömun á allri vinstri hlið líkamans. Þegar fótboltaferlinum lauk hóf Haukur að stunda spretthlaup hjá Íþróttafélagi fatlaðra í Reykjavík. Reyndar þurfti Arnór Pétursson, þáverandi formaður ÍFR, að ganga á eftir Hauki til að fá hann á hlaupabrautina. Það tókst á endanum og reyndist það heldur betur happadrjúg ákvörðun.

Það var á hlaupabrautinni sem frægðarsól Hauks reis sem hæst. Hann vann til tvennra bronsverðlauna á Ólympíumóti fatlaðra árið 1984, í 200 metra og 400 metra hlaupi, þá aðeins 17 ára gamall. Fjórum árum síðar mætti Haukur reynslunni ríkari á Ólympíumótið í Seoul 1988. Þar sigraði hann í 100 metra hlaupi í flokki C7 og varð fyrstur Íslendinga til að vinna til gullverðlauna í spretthlaupi. Haukur keppti á fernum Ólympíumótum og vann alls eitt gull og fimm bronsverðlaun og setti tvívegis heimsmet. Hann lagði keppnisskóna á hilluna að loknu Ólympíumóti fatlaðra í Atlanta árið 1996.

Það er ÍSÍ mikill heiður að útnefna Hauk Gunnarsson í Heiðurshöll ÍSÍ.

Myndasíða ÍSÍ - Haukur Gunnarsson